மாணவர் எண்ணிக்கை குறைந்த பாடசாலைகளின் அதிகரிப்பும் புதிய கல்விச் சீர்திருத்த கட்டமைப்பு மாற்றமும்.

-ஜெஸார் ஜவ்பர்-

கல்வி அமைச்சின் 2024 ஆம் ஆண்டின் முன்னேற்றம் மற்றும் 2025 ஆம் ஆண்டின் திட்டங்கள் தொடர்பான அறிக்கை அண்மையில் வெளியிடப்பட்டது.

இந்த அறிக்கையின் தரவுகள், பாடசாலைகளின் எண்ணிக்கை, மாணவர் மற்றும் ஆசிரியர் எண்ணிக்கை மற்றும் குறிப்பாக சிறிய பாடசாலைகளின் அதிவேகமான அதிகரிப்பு போன்ற விடயங்களில் ஏற்பட்டுள்ள மாற்றங்களை வெளிக் கொணர்ந்துள்ளது.

சிறிய பாடசாலைகளின் அதிகரிப்பு

மிகக் குறைந்த மாணவர் எண்ணிக்கையைக் கொண்ட பாடசாலைகளின் அதிகரிப்பு இந்த அறிக்கையின் மிகக் கவனிக்கத் தக்க அம்சமாகும்.

• 50க்கும் குறைவான மாணவர்கள் – 2024 ஆம் ஆண்டுக்கான அறிக்கையின்படி, 50க்கும் குறைவான மாணவர்கள் கல்வி கற்கும் பாடசாலைகளின் எண்ணிக்கை 1,506 ஆகும். இந்த பாடசாலைகளில் ஒரு தேசியப் பாடசாலையும் அடங்கியுள்ளமை அதிர்ச்சியளிக்கிறது.

• வருடாந்த அதிகரிப்பு – 2023 ஆம் ஆண்டு தரவுகளின்படி, 1 முதல் 50 வரையிலான மாணவர்களைக் கொண்ட பாடசாலைகள் 1,473 மட்டுமே இருந்துள்ளன. இது 2022 ஆம் ஆண்டை விட 33 பாடசாலைகளின் அதிகரிப்பாகும். சிறிய பாடசாலைகளின் எண்ணிக்கை தொடர்ந்து அதிகரித்து வருவது, பாடசாலை முறைமையின் நிலைத்த தன்மைக்கு ஒரு சவாலாக மாறியுள்ளது எனலாம்.

சிறிய பாடசாலைகள் தொடர்பான மேலதிக விபரங்கள்

• 100க்கும் குறைவான மாணவர்கள் – 1,638 பாடசாலைகள்

• 200க்கும் குறைவான மாணவர்கள் – 2,128 பாடசாலைகள்

• 500க்கும் குறைவான மாணவர்கள் – 2,638 பாடசாலைகள்

பாடசாலைகள் மற்றும் மாணவர்கள் எண்ணிக்கையில் வீழ்ச்சி

2022 மற்றும் 2023 ஆம் ஆண்டுகளுக்கு இடையிலான ஒப்பீட்டுத் தரவுகள், அரச பாடசாலைகளின் எண்ணிக்கையிலும், ஒட்டுமொத்த மாணவர் எண்ணிக்கையிலும் குறிப்பிடத்தக்க வீழ்ச்சியைக் காட்டுகின்றன.

• பாடசாலைகள் எண்ணிக்கையில் குறிப்பிடத்தக்க வீழ்ச்சி பதிவாகியுள்ளது.

2023 ஆம் ஆண்டில் இலங்கையில் உள்ள அரச பாடசாலைகளின் மொத்த எண்ணிக்கை 10,096 ஆகும். இது 2022 ஆம் ஆண்டின் எண்ணிக்கையான 10,126 உடன் ஒப்பிடுகையில், 30 பாடசாலைகளின் குறைவாகும்.

• மாணவர் எண்ணிக்கையிலும் குறிப்பிடத்தக்க வீழ்ச்சி பதிவாகியுள்ளது. 2023 ஆம் ஆண்டில் அரச பாடசாலைகளில் கல்வி கற்கும் மாணவர்களின் எண்ணிக்கை 3,882,688 ஆகும். 2022 ஆம் ஆண்டில் இந்த எண்ணிக்கை 3,969,597 ஆக இருந்தது. அதாவது, 2023 ஆம் ஆண்டில் மாணவர் எண்ணிக்கை 86,909 ஆல் குறைந்துள்ளது.

• ஆனால் ஆசிரியர்கள் எண்ணிக்கையில் அதிகரிப்பு பதிவாகியுள்ளது. மாணவர் மற்றும் பாடசாலைகளின் எண்ணிக்கையில் வீழ்ச்சி காணப்பட்டாலும், 2022 ஆம் ஆண்டுடன் ஒப்பிடுகையில் 2023 ஆம் ஆண்டில் ஆசிரியர்களின் எண்ணிக்கை 1,094 ஆல் அதிகரித்துள்ளது. இது, குறைந்து வரும் மாணவர் மற்றும் பாடசாலைகளின் எண்ணிக்கைச் சூழலில், மாணவர்-ஆசிரியர் விகிதத்தில் (Student-Teacher Ratio) சில சாதகமான மாற்றங்களைக் கொண்டு வரக்கூடும்.

(ஆசிரியர் மாணவர் விகிதம் இணைக்கப்பட்டுள்ளது)

பாடசாலைகளில் மாணவர் பரம்பல் (2023 தரவுகள்)

மாணவர்களின் செறிவுத் தன்மையை ஆராயும்போது, பெரும்பாலான பாடசாலைகளில் குறைந்த எண்ணிக்கையிலான மாணவர்களே கல்வி கற்கின்றனர் என்பது தெளிவாகிறது.

• 200க்கும் குறைவான மாணவர்கள் – 2023 ஆம் ஆண்டில், 50%க்கும் அதிகமான அரச பாடசாலைகளில் 200க்கும் குறைவான மாணவர்களே கல்வி கற்றுள்ளனர். (51-100 மாணவர்கள்: 1,638 பாடசாலைகள், 101-200 மாணவர்கள்: 2,128 பாடசாலைகள்).

• 500க்கும் குறைவான மாணவர்கள் – 201 முதல் 500 வரையிலான மாணவர்களைக் கொண்ட பாடசாலைகள் 2,638 ஆகும். இதன் அடிப்படையில், மொத்த அரச பாடசாலைகளில் 78%க்கும் அதிகமானவற்றில் 500க்கும் குறைவான மாணவர்களே கல்வி கற்கின்றனர் என்பது தெளிவானது.

இதற்கு மாறாக, மாணவர்களின் எண்ணிக்கை அதிகமுள்ள பாடசாலைகளின் பரம்பல்

மாணவர்களின் எண்ணிக்கையும் பாடசாலைகளின் எண்ணிக்கையும்

501 – 1000 : 1,309

1001 – 1500: 379

1501 – 2000: 200

2001 – 3000: 198

3001 – 4000: 67

4001 இற்கு மேல் 33

மொத்தம் (501 இற்கு மேல்) 2,181

மேலே உள்ள தரவுகளை ஆராயும் போது இலங்கையின் கல்வி முறைமை தொடர்பான முக்கியமான உண்மை ஒன்று வெளிப்படுகிறது.

மொத்த அரச பாடசாலைகளில் (10,096) சுமார் 12% ஆக உள்ள, 500க்கும் அதிகமான மாணவர்களைக் கொண்ட 2,181 பாடசாலைகளிலேயே, மொத்த மாணவர் தொகையான 3,882,688 இல் 2,568,224 மாணவர்கள் கல்வி கற்கின்றனர்.

அதாவது, மொத்த மாணவர் தொகையில் 66.14% பேர் வெறும் 12% ஆன பாடசாலைகளிலேயே கல்வி பெறுகின்றனர்.

இந்த செறிவுத் தன்மை, வளங்கள் மற்றும் ஆசிரியர்களைப் பொறுத்தவரை, பெரிய மற்றும் சிறிய பாடசாலைகளுக்கு இடையிலான சமநிலையற்ற தன்மையையும், அதிகப்படியான மாணவர் அடர்த்தியைக் கொண்ட பாடசாலைகளின் மீதான அழுத்தத்தையும் சுட்டிக்காட்டுகிறது.

கல்வி அமைச்சின் இந்தத் தரவுகள், இலங்கையின் பாடசாலை முறைமை ஒரு மாற்றத்தின் கட்டத்தில் உள்ளது என்பதைக் காட்டுகிறது. சிறிய பாடசாலைகளின் அதிகரிப்பு, மொத்த மாணவர்களின் எண்ணிக்கை மற்றும் பாடசாலைகளின் எண்ணிக்கை குறைவது ஆகியவை கவனத்தில் கொள்ளப்பட வேண்டிய முக்கிய சவால்களாகும். இந்த புள்ளிவிவரங்கள், எதிர்காலத்தில் கல்வி வளங்களை ஒதுக்கீடு செய்தல், ஆசிரியர் இடமாற்றங்கள் மற்றும் சிறிய பாடசாலைகளை முகாமைத்துவம் செய்தல் போன்ற விடயங்களில் கொள்கை வகுப்பாளர்களுக்கு முக்கியமான செய்திகளை வழங்கும் என்பதில் சந்தேகமில்லை.

கட்டமைப்பு சீர்திருத்தம்: சிறிய பாடசாலைகளை மூடுவதற்கான புதிய கொள்கை

இந்தச் சமநிலையற்ற நிலையைச் சீர்செய்யும் நோக்கில், புதிய கல்விச் சீர்திருத்தம் கட்டமைப்பு மற்றும் நிர்வாகச் சீர்திருத்தம் என்ற தூணின் கீழ், பாடசாலைகளை ஒழுங்குபடுத்தும் நீண்ட காலத் தேவையை அரசாங்கம் மேற்கொள்வதற்கான கொள்கைத் தீர்மானத்தை மேற்கொண்டுள்ளது.

கல்வி அமைச்சு வெளியிட்டுள்ள நியதிகளின் அடிப்படையில், பின்வரும் காரணிகளைக் கொண்ட பாடசாலைகள் தற்காலிகமாக மூடுவது குறித்துப் பரிசீலிக்கப்படலாம்

1. ஒரு வகுப்பில் 10க்கும் குறைவான மாணவர் எண்ணிக்கை அல்லது பாடசாலையின் மொத்த மாணவர் எண்ணிக்கை 50க்கும் குறைவாக இருத்தல்.

2. பாடசாலை அமைந்துள்ள இடத்தில் இருந்து 5 கிலோமீட்டர் தூரப் பிரதேசத்தில், மூடப் பரிசீலிக்கப்படும் பாடசாலை வகைக்கு சமனான அல்லது உயர்ந்த தரம் வாய்ந்த பாடசாலை அமைந்திருத்தல்.

இந்த நடவடிக்கையின் முக்கிய நோக்கம், குடியிருப்புக்கு அருகில் அனைத்து வசதிகளுடன் கூடிய தரமான கல்வியை ஒவ்வொரு மாணவருக்கும் வழங்குவதாகும். மூடப் பரிந்துரைக்கப்படும் பாடசாலைகளில் கல்வி பயிலும் மாணவர்களை, அவர்களுக்கு இலகுவாகச் செல்லக்கூடிய பொருத்தமான ஒரு பாடசாலையில் சேர்க்க வேண்டும் என்றும் அமைச்சு அறிவுறுத்தியுள்ளது. இந்தத் தீர்மானத்தை மாகாணக் கட்டமைப்பு குழுவோ அல்லது கல்வி அமைச்சின் கட்டமைப்பு குழுவோ பரிசீலிக்கலாம்.

மாகாண கல்விப் பணிப்பாளர் மூன்று வருடங்களுக்கு ஒருமுறை மாகாணத்தின் பாடசாலைகளைப் பகுத்தறிதலை மேற்கொள்ள வேண்டும்.

சிறிய பாடசாலைகளை மூடுவதன் விளைவுகள்

சாதகங்கள் Vs பாதகங்கள்

சிறிய பாடசாலைகளை மூடுவது என்பது செலவு குறைப்பு மற்றும் தரமான கல்வியை வழங்குதல் ஆகிய நிர்வாகக் காரணிகளுக்கு எதிராக, சமூகப் பிணைப்பு மற்றும் மாணவர்களின் அணுகல் வசதி ஆகியவற்றைச் சமநிலைப்படுத்துவது அவசியம் என்பதைக் காட்டுகிறது

நன்மைகள் (சாதகங்கள்)

• செலவுக் குறைப்பு மற்றும் வளச் செயல்திறன்

கட்டிடப் பராமரிப்பு, போக்குவரத்து மற்றும் குறைந்த மாணவர் எண்ணிக்கைக்கு பல ஆசிரியர்களை நியமித்தல் போன்ற செயற்பாட்டுச் செலவுகளைச் சேமிக்கலாம். ஆசிரியர்களை அதிக மாணவர்கள் உள்ள பாடசாலைகளுக்கு மாற்றி, ஆசிரியர் வளங்களைச் சிறப்பாகப் பயன்படுத்தலாம்.

• மேம்படுத்தப்பட்ட கல்வி வாய்ப்புகள்- மூடப்பட்ட பாடசாலைகளின் மாணவர்கள் பெரிய, ஒருங்கிணைக்கப்பட்ட பாடசாலைகளுக்குச் செல்லும்போது, அவர்கள் விஞ்ஞான ஆய்வகங்கள், நூலகங்கள், கணினி அறைகள் போன்ற மேம்பட்ட வசதிகளையும், உயர்தரக் கற்கைகள் உட்பட பலதரப்பட்ட பாடத் தெரிவுகளையும் பெறலாம்.

• தரமான நிர்வாகம்-குறைவான எண்ணிக்கையிலான பெரிய பாடசாலைகளைக் கண்காணிப்பது இலகுவானதால், கல்வித்தரத்தை ஒரே சீராகப் பேணுவது இலகுவாகிறது.

தீமைகள் (பாதகங்கள்)

• சமூகத் தாக்கம் மற்றும் அணுகல்: சிறிய கிராமப்புறப் பாடசாலைகள் பெரும்பாலும் சமூகத்தின் மையப் புள்ளியாகச் (Hub) செயற்படுகின்றன. பாடசாலை மூடப்படும்போது சமூகக் கூட்டங்கள் மற்றும் சமுதாய அடையாளத்தின் முக்கிய பகுதி இழக்கப்படுவதுடன், மாணவர்கள் புதிய பாடசாலைக்குச் செல்ல அதிக தூரம் பயணிக்க வேண்டியிருக்கும். இது போக்குவரத்துச் செலவு, பாதுகாப்புப் பிரச்சினைகள் மற்றும் நேரத்தை வீணடிப்பதை ஏற்படுத்தும்.

• பாடசாலை இடைவிலகல் அதிகரிப்பு- நீண்ட தூரப் பயணம் மற்றும் புதிய சூழலுக்கு இசைவாமை கொள்ள முடியாத சிரமம் காரணமாக, குறிப்பாக வறிய குடும்பங்களைச் சேர்ந்த மாணவர்களிடையே பாடசாலை இடைவிலகல் அதிகரிக்க வாய்ப்புள்ளது.

• கல்விச் சவால்கள்- பெரிய பாடசாலைகளில் மாணவர் சேர்க்கை அதிகரிப்பதால், வகுப்பு அளவுகள் அதிகரிக்கலாம். இது ஆசிரியர்களின் கவனத்தைக் குறைத்து, தனிப்பட்ட மாணவர்களுக்கான கவனம் செலுத்தும் வாய்ப்புகளைக் குறைக்கலாம். மேலும், சிறிய சூழலில் இருந்து வரும் மாணவர்கள் பெரிய சூழலுக்கு இசைவாமை கொள்வது சவாலாக அமையலாம்.

கல்வி அமைச்சின் இந்தத் தரவுகள், வளங்களை ஒதுக்குதல், ஆசிரியர் இடமாற்றங்கள் மற்றும் சிறிய பாடசாலைகளை முகாமைத்துவம் செய்தல் போன்ற எதிர்காலக் கொள்கை வகுப்புகளுக்கு முக்கியமான செய்திகளை வழங்குகிறது.

புதிய சீர்திருத்தம், நிர்வாகத்தின் செயல்திறனை மேம்படுத்தும் அதே வேளையில், கிராமப்புறச் சமூகப் பிணைப்பு மற்றும் மாணவர்களின் அணுகல் வசதி போன்ற முக்கிய அம்சங்களைப் பாதுகாப்பதில் மிகவும் கவனமாக இருக்க வேண்டும். இதனை உரிய வகையில் முகாமை செய்ய கல வி அமைச்சு முனைந்து வருகிறது.

-ஜெஸார் ஜவ்பர்-